Oasis-in nakkumah tour nei dawn

English rock band Oasis chuan nakkumah tour an neih dawn thu leh, May thlaah Scotland-ah khuh hawn a ni dawn tih an puang. Oasis hian nikum khan London-a Wembley Stadium-ah tour tawp kharna an lo nei tawh a, tun thla tir lam khan venue hrang hranga tour an neih chhunzawmna tur hmunte X-ah an pholang a ni.

Band lead guitarist leh co-lead vocalist, Noel Gallagher chuan Talksport-in an kawmnaah, nakkuma tour an neih tur atan inbuatsaihna an nei mek tih a sawi. Oasis hian nikum September thlaa Wembley show tawp kharnaah, lead vocalist Liam Gallagher chuan kumin hian show an neih chhunzawm dawn tih a lo sawi tawh bawk. Liam leh Noel-te unau hi kum 2024 August thla aṭang khan band angin an che chhuak ṭan leh a, United Kingdom-ah reunion tour nei turin an inbuatsaih nghal a ni.

Kum 2025 July thla khan U.K.-a Cardiff-ah reunion tour khuh hawngin, Europe hmun hrang hrangah show hlawhtling tak an nei a ni. August thlaah North America-ah show an neih chhunzawm a, East Rutherford leh Los Angeles bakah, Mexico City-ahte an perform bawk.