78th Primetime Emmy Awards : "Widow's Bay"-in awards 14 dawng

Kumtina sem ṭhin television program hrang hrang che ṭhate hnena chawimawina hlan ṭhin, 78th Primetime Emmy Awards chu Thawhṭanni khan Peacock Theater, Los Angeles-ah sem a ni. Apple TV horror comedy 'Widow Bay' che ṭha berin awards 14 a hum haw thei. Show hi Mariska Hargitay host-na hnuaiah neih a ni.

Primetime Emmy sem a nih hma hian Emmy awards huanga sem ṭhin Daytime Emmy, leh International Emmys-te chu sem a lo ni tawh bawk. Heng awards huang hrang hrang aṭang hian 'Widow's Bay' chu che ṭha ber niin record thar a siam a, nomination 19 a hmuh aṭangin awards 14 dawngin season khata dawng hnember record a siam. Hei bakah he film a changtu Matthew Rhys chuan Emmy history thar a siam bawk a, lead actor category pahnih aṭanga award la thei hmasaber niin 'Widow's Bay' leh 'The Beast in Me' te hmangin a dawng a ni.

'Late Night With Stephen Colbert' chuan Variety series category-ah lawmman dawngin hei bakah hian category dang pangaah awards a la thei bawk. HBO Max medical drama "The Pitt" chuan a kum zawnin Drama series-ah award lain, a changtu Noah Wyle chuan 'Outstanding Lead Actor in a Drama Series' a dawng tel bawk. Nomination 25 hmu The Pitt hian award paruk a dawng. HBO lam kutchhuak 'DTF St, Louis' chuan limited series huangah award a la thei bawk.