MZI 2nd Inter HS & HSS Beat Contest zo fel ta; St. Paul HSS band 'Count to Five' an thiam ber

Mizo Zaimi Inzawmkhawm (MZI) General Headquarters buatsaih, "2nd Inter HS & HSS Beat Contest", September 9-10 chhunga neih chu nimin khan an zo fel ta. Finalist school 16 zingah St. Pauls Higher Secondary School band 'Count to Five' chu an thiam ber.

2nd Inter HS & HSS Beat Contest-ah hian sikul hrang hrang aṭangin band 60 velin video an theh lut a ni. Band tel tumte video demo endik a, thlitfim a nih hnuin Nilaini leh Ningani khan Top 16 ten live-in intihsiakna hi an nei a ni. Intihsiakna endiktute hi rimawi huanga mi thiam leh sulhnu nei ṭha tak tak - John LT Sanga, Eric Renza, Puia, Samuela, Rema leh Patea te an ni a, winner pawh an thlang sual lo hle.

IHS&HSS beat contest lawmman hi pakhatna in Rs 70,000; pahnihnain Rs 50,000 leh pathumnain Rs 30,000 an dawng. Hei bakah Top 7 chin hnenah Rs 10,000 ṭheuh pek an ni bawk. Mimal lawmman pawh sem tel niin discipline tina tiṭhate chu Rs 1,000 leh citation hlan an ni.

Band intihsiakna hi September 9-10 chhungin neih a ni a, zirlai tana inelna buatsaih a nih avangin hun rei tak awh tura tih theih a nih loh thu MZI chuan an tarlang. MZI hian nikum khan a vawi khatna atan Inter High School & Higher Secondary School beat contest hi an buatsaih a, ngaihhlut a hlawh em avangin kuminah a buatsaih chhunzawm leh a ni.