Beyoncé-i'n Indiana tuilian tuarte tan USD 200,000 thawh leh

Pop rimawi khawvela thawm nei lian leh huhang ngah, Grammy Award dawng hnem ber pawl Beyoncé Knowles-Carter chuan a welfare foundation BeyGOOD hmangin Indiana state-a tuilian tuarte ṭanpuinan USD 200,000 a thawh tih Billboard chuan a tarlang.

August thla laihawl chho khan Indiana-ah hian thlipui leh ruahthimpui a thawk a, tuilianin in leh lo tam tak a tichhia a ni. Mi 1,000 ai tam in leh lo nei loin a siam a, US sorkar pawhin chhiatrupna thleng 'Major Disaster' tiin official-in a puang hial a ni.

Beyoncé ṭanpuina hi Gary khawpui leh a bul hnai chhiatna tuarte hnenah 'City Life Center' leh 'Angel by Nature' pawlte kaltlangin sem a ni dawn a. Hetah hian ei leh bar, in chhung hmanrua leh mamawh dangte puih nan hman a ni ang. BeyGOOD Foundation hi kum 2013-a din a ni a, chhiatna thlenga mite chhawmdawltu a ni. Beyoncé hian tun hnai khan Colombia lirnghing tuarte tan pawh USD mtd 1 a lo thawh bawk.