LBS SUZUKI 1st Inter Branch YMA Band Contest 2026 Top 20 intihsiak ṭan a ni

Central YMA hnuaia Branch YMA hrang hrangte tana zai leh rimawi hmanga intihsiakna hmasa ber tur LBS SUZUKI 1st Inter Branch YMA Band Contest 2026 chu, kumin August 18 Thawlehni zan aṭang khan Vanapa Hall-ah Top 20 ten intihsiakna an nei ṭan. Nizan khan branch pariatin in elna hmachhawnin Grand Finale hi August 28 zanah neih a ni ang.

Band Contest-ah hian Mizoram hmun hrang hrang aṭangin Branch 50 zet an tel a; an zai record te soft copy a thehluh a nih hnuah, endiktuten Vanapa Hall-a intihsiak chhunzawm tur Branch 20 te thlangchhuak leh in nizan aṭang khan Branch 20 te hian intihsiakna an chhunzawm ṭan tawh a ni.

Intihsiaknaa tel Band-te hi Mizo hla hmanga intihsiakin, Mizo rimawi hmanrua 'traditional musical instruments' leh Mizo thuamte hmang ngei tura beisei an ni. Intihsiakna a inel tur Branch te hi an mahni ṭawiawmtu tur an Branch YMA member mi 50 zel hall chhunga hruailuh phalsak an ni bawk.

He intihsiakna hi Central YMA hnuaia Music & Sound Sub-Committee te buatsaih a ni a, an ni hian Organising Committee-te din leh in, Organising Committee-ah hian tunlai a Mizo musician ṭha tak tak te an tel bawk a ni. Intihsiakna hi judge pathum Lalrinzauva Sailo, Er. Zohmingthanga (Hmingpuia) leh Lalhmachhuana Hauhnar ten endik hna an thawk a ni.

Central YMA hnuaia Branch YMA pual a Band intihsiakna hmasa ber a nih avangin Mizo rimawi chawisanna kawngah he Band Contest hi a hlu hle tura ngaih a ni. Nizan khan Branch pariat aiawhte'n intihsiakna hmachhawnin, zanin hian Bawngkawn West Branch, College Veng Branch, Electric Veng Branch, Ramthar North Branch, Tuikual South Branch, leh Bawngkawn Branch ten intihsiakna an hmachhawn leh dawn a; nak zanah khian Branch pasarihin in elna an hmachhawn leh dawn a ni.