India state tina thisen pek tumin Aizawlah thisen rawn pe

India ram state tina thisen pek tum Uttar Pradesh-a Gorakhpur tlangval Atul Singh chuan July 25, Inrinni khan Civil Hospital, Aizawl blood bank-ah thisen a pe a, thisen a pek vawi 42-na leh state 24-a thisen a pekna a ni.

Atul Singh hian India ram state tina thisen pek a tumna hi 'Mission 28 States' tiin a vuah a, Mizorama thisen pe turin Inrinni khan Delhi aṭangin Aizawl a rawn pan a, Inrinni vek khan Civil Hospital-ah thisen a pe nghal. Mizoram hi thisen a pek state 24-na a ni a, state pali - Manipur, Tripura, Kerala leh Tamil Nadu te a la hmabak a ni.

Atul Singh hi Association for Voluntary Blood Donation (AVBD), Mizoram hruaitute'n an lo dawngsawng a, a hmalakna chawimawi nan AVBD aiawhin vice president K Zothanpara'n thuchei a hlan. AVBD hruaitute chuan, Atul Singh-a hmalakna chu ṭha an tih thu leh chhuanawm an tih thu an sawi.