World Cup chhunga Instagram follower pung nasa ber Erling Haaland

Kumin FIFA World Cup-ah Spain chuan hnehna chang mah se, footballer zingah Instagram-a follower neih tam lamah social media-a boruak nei lian, Norway striker Erling Haaland a sang ber thung. Haaland hian tournament ni 39 neih a nih chhungin, instagram-ah follower mtd 32.1 a neih belh tih Thawhṭanni khan Sportico data chuan a tarlang.

Cape Verde goalkeeper, kum 40 mi Vozinha chu follower neih belh tam lamah pahnihna a ni a, group stage-a Spain nen an intum aṭanga a performance ṭha tak avang khan ngaihven a hlawh hle. Ani pawh hian follower mtd 29.2 neih belhin, Spain nen an intum aṭanga ni li hnu lekah follower mtd 14 a neih belh hman a ni. England midfielder Jude Bellingham chu pathumnaah awmin, follower mtd 12 a neih belh ve bawk a, Cristiano Ronaldo chuan follower mtd 11.4 neih belhin athlete zinga follower nei tam ber a ni chhunzawm zel. Spain superstar Lamine Yamal chuan follower mtd 11 a neih belh bawk.

Brazil star Neymar chuan World Cup chhungin IG-ah follower mtd 7.7 a neih belh a, Messi chuan mtd 7.5 neih belhin, tun dinhmunah follower mtd 514 a nei mek a, athlete zinga Instagram-a follower nei tam ber pahnihna a ni. Mexico midfielder Gilberto Mora pawhin mtd 6.6 neih belhin, France star Michael Olise chuan mtd 5.7 leh Brazil winger Endrick chuan mtd 5.6 te an neih belh a ni.