World Cup half-time show-in mit titlai

2026 FIFA World Cup final chu Pathianni zing khan neih a ni a, half-time show minute 27 leh second 22 hman niin rimawi khawvela mi lar rual - Madonna, BTS, Shakira leh Justin Bieber-te an inlan a, mit leh beng a tlai phah hle.

Kum 67 mi, Madonna chuan a 2000 dance-pop hit, 'Music' a sa a, tunnel aṭanga rawn chhuakin Brazilian football legend pahnih - Ronaldo leh Ronaldinho te a rawn hruai chhuak. A kum upa deuh tawh mah se Queen of Pop nih a phuzia a la rawn lantir thei.

K-pop fan lamin an nghahhlelh, BTS pawh rin lawk ang ngeiin an che ṭha leh hle. An hla hit 'Dynamic' an sa a, an chevel a hmuhnawm a, hun pek belh an chakawm. Justin Bieber chuan mipui nawlpui rin loh deuhin 'Everything Halleluijah' a rawn sa a, lampui chiam chi ni lo mah se a zaithiam tih phat rual a ni lo. Halleluijah tih zawh rualin Shakira leh Burna Boy te an rawn che ve thung a, World Cup 2026 official song 'Dai Dai' sain, mipui an ṭhap ṭha hle.

FIFA-in Super Bowl style-a a ṭum khatna atana World Cup half time show a buatsaih hian sawi pawh a hlawh hle a, ṭha titu leh duh lotu pawh awmin, inhnialna pawh a titam hle. Mahse, music fan-te tan World Cup final tinghahhlelhawmtu a ni ve a, a hlu hle a ni.