SEVENTEEN member-ten Pledis Entertainment-ah contract an renew

South Korean boy band, SEVENTEEN member 13 te chuan hun rei tak an lo awm tawhna agency, PLEDIS Entertainment-ah a vawi hnihna atan contract an renew leh ta. He thu hi July 13 khan an agency chuan a puang a, member military service zo fel tawhten contract an ziah tawh thu leh, service mekte chuan an dinhmun a zirin contract hi an ziak ve leh dawn tih a tarlang.

Hei hi agency-a group-in contract an renew vawi hnihna a ni a, kum 2021 khan a vawi khatna contract hi renew in, kum 2015-a an debut aṭanga tun thlengin SEVENTEEN hi member 13 an la ni chhunzawm zel a ni. Member-te chuan an thutlukna chungchanga thuchhuah an siamah, member kima chet chhuah chhunzawm zel an tum tih tarlangin, fan-te thlawp zuina an ngen nghal bawk. PLEDIS Entertainment pawhin SEVENTEEN group, unit leh mimal anga an chet chhuahna turah an thlawp zui zel dawn tih an sawi bawk.