Albuquerque Mayor-in Machine Head hnenah khawpui chahbi pe

New Mexico state-a khawpui lian ber, Albuquerque Mayor Tim Keller chuan Oakland groove metal band, Machine Head band hnenah an khawpui chawimawina chi khat, khawpui chahbi chu kar liam ta khan a hlan. Machine Head hian an instagram-ah hei hi post-in, chawimawina sang tak a ni tiin an lawm thu an sawi.

Machine Head hian metalcore band lar, Killwitch Engage nen North American tour an nei mek a, Albuquerque-ah concert ṭan hmain Mayor Keller hian a hmu a ni. Khawpui chahbi hi hlanin, fiamthuin Albuquerque Jail chahbi pawh a ni tel nghal tih a sawi.

Albuquerque Mayor Keller-a hi metal music a ngainat avangin ‘Metal Mayor’ tih hialin an ko ṭhin. Kum 2024 leh 2025 khan Albuquerque khawpui chahbi hi Iron Maiden frontman Bruce Dickinson, Testament band, Soulfly hruaitu Max Cavalera leh Judas Priest member-te hnenah a lo hlan tawh a, September 19 chu 'Iron Maiden Day' atan a lo puang tawh bawk a ni.