Lehkhabu bawm: 'TAXI PU TITI' lehkhabu tlangzarh

Kum 2025 a Tourism Department in 'Best Taxi Driver' chawimawina an hlan, H. Laldanmawia lehkhabu ziah, ‘Taxi Pu Titi’ tih chu Minister of State, Tourism Department Lalnghinglova Hmar chuan MINECO, Aizawla a office chamber-ah Zirtawpni liam ta khan a tlangzarh. Lehkhabu tlangzarh inkhawm hi Dr. Daniel Lalawmpuia'n a kaihruai a, Rev. JH Zahluna'n hunserh a hmang.

Lehkhabu tlangzarhtu Minister chuan, Taxi driver-te hi Tourism Department thlirnaah chuan tour guide an ni a, information centre hmasa ber an ni bawk tih a sawi. "Taxi driver kan neih ṭhat chuan tourism a ti ṭhang dawn a, kan neih ṭhat loh chuan rel a lo lutte an lo kal nawn tawh lo mai thei a, an lo kal nawn fo erawh chuan tourist hmun ṭha tak kan ni mai dawn a, chuvang chuan kan inkungkaihna hi a hnai em em a ni. Khualzin lo kal zawng zawng deuhthaw ten kan rama an rawn hman hmasak ber an nih avangin keini tan chuan an pawimawh hle a ni," a ti. Taxi driver tam tak chu Mizoram tana pawimawh leh hnam tana mi hlu an ni a, chutiang chiah chuan ṭhenkhatte chu an ṭangkai tluk zetin hnam tana pawi khawih thei an ni, a ti.

He lehkhabu ziaktu H. Laldanmawia hi kum 2025 khan World Tourism Day-ah taxi driver ṭha lawmman dawng tura thlan a ni a, veng chhung chanchinbu leh hmun hrang hrangah thu lo ziak tawh ṭhin a ni bawk. Lehkhabu thlirlawktu Dr. H. Laldinmawia chuan, he lehkhabu-ah hian thuziak ṭha tak tak 64 lai a awm thu leh, 'Taxi Pu Titi' tia a bu hmingah phuah a nih avang hian a nuihzatthlak zawng te, a ngaihnawm lai deuhte awm tura ngaih a awl viau laiin, mihring nun infuih tharna lam lehkhabu, 'Motivational literature' ṭha tak a nih thu a sawi. Lehkhabu hi phek 202-a chhah niin Rs. 250 man a ni.