August-ah Sara Bareilles album thar

American singer- songwriter leh actress, Sara Bareilles chuan a album thar 'Good Grief' tih chu kumin August 28 hian a tlangzarh dawn a, September leh October thlaah North American theatre hrang hrangah tour a nei bawk dawn a ni.

'Good Grief' hi kum 2019 hnua Bareilles-i'n studio album a tihchhuah lehna hmasa ber a ni. Album aṭanga a single 'Home' pawh a tichhuak tawh bawk. Hei bakah a album siam dan pholanna 'Sara bareilles: Good Grief' tih documentary chu nizan khan New York-a Beacon Theatre-ah tlangzarh a ni bawk. Tour a neih tur hi Live Nation produce a ni a, kumin September 9 hian Boston-a MGM Music Hall-ah khuh hawn a ni dawn a, October 19-ah Seattle-a Paramount Theatre-ah a tawp khar a ni ang.

Bareilles hian tour a neih karlakah Washington, Toronto, Philadelphia, Atlanta, Cincinnati, Chicago, Minneapolis, St. Louis, Denver, Austin, Houston leh San Francisco-ah a perform bawk dawn a ni.