'Minecraft' movie sequel siam dawn

Adventure comedy film video game behchhana siam, 'Minecraft' movie sequel 'A Minecraft Movie Squared' tih chu siam a ni dawn. Warner Bros. leh Legendary PG adventure movie 'A Minecraft Movie' tih nikuma tihchhuahah khan Jack Black leh Jason Momoa-te changin, tihchhuah a nihin ramchhungah USD mtd 163 la lut nghalin, khawvel puma a sum lak luh zawng zawng chu USD mtd 960 a tling a ni. Film-ah hian Danielle Brooks, Matt Berry leh Jennifer Coolidge-te an chang bawk.

'Minecraft' sequel hi siam mek niin, Jared Hess chuan a direct leh dawn a, American actress Kirsten Dunst pawh a changtu zingah a tel dawn a ni. Hess leh Chris Galletta-te chuan 'A Minecraft Movie Squared' screenplay ziakin, nakkum July 23-ah theatre-ah tlangzarh tura ruahman a ni. Film sequel-ah hian Berry pawh a chang leh dawn a, Dunst hi Alex lemah a chang dawn a ni. Producer zingah Mary Parent, Cale Boyter, Roy lee, Eric Mcleod, Momoa leh midang telin, executive producer-te chu Jay Ashenfelter, Jen Conroy, Brian Mendoza, Jon Berg leh Jonathan Spaihts-te an ni.