Billboard 200: Drake in album thar pathum hmangin chart awp bet

Billboard 200 album chart tharah Canadian rapper leh singer, Drake chuan May 15-a a ruala album pathum a tihchhuahte hmangin Top 3 a luah vek. Album thar tihchhuah zingah 'ICEMAN' chu No.1 ah awmin a dang pahnih, 'HABIBTI 'leh 'MAID OF HONOUR' te chu pahnihna leh pathumnaah an awm.

Drake hian album thar pathum hmang hian record thar siamin soloist zinga Billboard 200 chart-a No.1 ni thei ngun ber ni nghalin, Taylor Swift nen No.1 an nih zat a in ang ta chiah a ni. 'ICEMAN' hian equivalent album unit 463,000 nei tling nghalin, kumin chhunga R&B/HipHop album tihchhuah tawha che ṭha ber dawttu a ni bawk.

'HABIBTI' hian kar hmasa chhung khan equivalent album unit 114,000 a nei a, 'MAID OF HONOUR' album hian equivalent album unit 110,000 a nei tling ve bawk. Album pathum a ruala tihchhuah mah ni se an che ṭha vek thei hi a ropui danglam hle.

Chart pawh lo thunun tawhtu Noah Kahan album thar 'The Great Divide' chu palinaah a tla thla a, kar hmasa chhung khan equivalent album unit 101,000 a neih belh. Ella Langley pawh 'Danddelion' album hmangin panganaah a la inhamtang zel a, album unit 98,000 a neih belh ve leh bawk.