DDK Zo-awi Zunzam: Zaninah Joseph Zaihmingthanga pualin hun hmang dawn

Doordarshan Kendra Aizawl chuan Mizo zaithiam leh hlaphuah thiam fam tate puala hun a buatsaih ṭhin, 'Zo-awi Zunzam' chu zanin hian a buatsaih leh dawn. Zanin hian Mizo zinga zaithiam kan neih ṭhat leh huhang nei ngah, Joseph Zaihmingthanga pualin hun hman a ni dawn a; programme hi zan dar 7 - 10 thleng hman a ni ang.

Joseph Zaihmingthanga hi a vanglaia Zoram dengchhuak thei khawpa zaithiam lar leh huhang ngah, a zai dan leh style danglam tak avanga mite chhinchhiah rawn a ni a, May 7, 2023 khan kum 43 mi niin a thi a ni. "Tahchuan a leng" tih hla hmanga Zofate min awitu Joseph-a hian album pali tichhuak hmanin, a zai thiam bakah hla phuah thiam tak a ni tel. Music video tam tak a siam hman a, hla ṭha tak tak Zofate min hnutchhiah a ni.

Programme hi DD Mizoram TV Channel leh Youtube channel-ahte live-in tihchhuah a ni dawn a, zaithiamte zai thlira ngaihthlak tur a awm dawn bakah Joseph Zaihmingthanga chanchin leh sulhnu tarlanna documentary tawi tihchhuah a ni dawn bawk.

Tute nge zai dawn ?

Zanina hun hman turah hian tunlai zaithiam lar ber berte an inlan dawn a, anni hian Joseph Zaihmingthanga lengzem leh fakna hlate an rawn sa ang. Joseph-a zai ngaina leh a fan-te tan chuan hmaih phal chi a ni lo ang.