Yi Mizoram Chapter-in 'Young Indians Parliament(YIP) 2026' buatsaih dawn

Young Indians (Yi), Mizoram Chapter chuan Mizorama a vawi khatna atan Class 9-12 zirlaite tan ram rorelna leh thupui hrang hrang an thur chhuahte hmanga sawi ho na tur, 'Young Indians Parliament (YIP) 2026' chu June 4-5 hian an buatsaih dawn. YiP hi Mizoram Legislative Assembly Hall-ah hman a ni dawn a, Mizoram Legislative Assembly Speaker-in programme hi a hawng ang.

Parliament simulation-ah hian school pakua(9) aṭangin zirlai an in-register tawh a, zirlai 100 chuang an tel beisei a ni. Mizoram chhunga inelna (Chapter Round) neih a nih hnuah zirlai tiṭhate chu India hmarchhak huap North East Regional Round, Guwahati-ah an tel leh ang a, an tiṭha a nih chuan ram pum huap inelna National Round, Vizag (Visakhapatnam)-ah an tel thei dawn a ni.

He hmalakna hi zirlaiten ram inrelbawlna leh rorelna kalphung an hriat fiahna atana duan a ni. Zirlai naupangte’n sorkar policy hriat thiamna, vantlang hmaa inringtawk taka thu sawi leh hruaitu ṭha nihna kawnga hma an sawn theihna tura buatsaih a ni.

Young Indians (Yi) hi kum 2002 khan Confederation of Indian Industry (CII) hnuaia din niin, India ram chhunga ṭhalai rual, entrepreneur, professional leh hruaitu ni mekte intelkhawmna a ni. Ram siamṭha tur leh tihhmasawnna kawnga ṭhalaite fuih hna an thawk ṭhin.

Yi Mizoram Chapter hian Mizoram ṭhalaite chher hriam nan leh khawtlang tihhmasawn nan hma an la reng a, corporate hrang hrangte CSR (Corporate Social Responsibility) Fund hmangin mipui tana ṭangkai tur tualchhung hnathawh (social works) tam tak an lo thawk tawh. Kumin 2026 chhung hian SR Fund hmang hian hmalakna lian tak tak an kalpui a, Phuaibuang leh Darzo khuaah Ground Water Harvesting atana hmalakna bakah School hrang hrangah RO filters, damdawi leh sports equipments te an pe bawk a ni.