President-in inhmuhkhawmna a siamah Lapâr aiawhte tel

India president Droupadi Murmu chuan kumin Republic Day-a “At Home” reception Rashtrapati Bhavan-a tel mi pawimawh sawmte “Invitation kit”pek chhuah siamtu, hmarchhak state pariat aiawhte chu May 19, 2026 khan inhmuhkhawmna hun a siamsak. He hunah hian Mizoram aṭangin Lapâr aiawhte an tel.

Repubic Day lawmnaah khan hmarchhak state pariatte kutchhuak chawimawina hun remchang buatsaih sak niin, “Invitation kit” chu an themthiamna leh kut chhuak hmanga siam a ni. Hetah hian Mizoram aiawhin Lapâr chu thlan a ni. Lapâr hi Mizo textile brand a ni a, an puan vang hian hriat a hlawh hle.

“Invitation kit”siamtute puala Rashtrapati Bhavan-a inhmuhkhawmna hun siamah, Mizoram aiawha buaipuitu, Lapâr atangin Patricia Zadeng - Lapâr Founder, Lalremruati - Designer, Vanlalhmangaihi - Quality check tu, Lapâr Puantahtute- Lalrinpuii, Chingngaihlian leh Chingngaihdawn te leh NEHHDC atangin Flora Khiangte te kalin President hi an zu hmu a ni. Flora Khiangte hi Rashtrapati Bhavan, Hyderabad cheitu zingah a tel bawk.

National Institute of Design, Ahmedabad kaltlangin Northeast state hrang hranga kutthemthiam tak takte thawhpuiin he “Invitation kit” hi siam chhuah a ni a, Lapâr hian kawngvawn kuttah hmangin Mizo Puancheia zia, lenbuangṭhuam leh sakeizangzia a siam a ni. State dang pawhin an hnam bil themthiamna te tarlangin, Tripura leh Meghalaya in mau leh hruihnang hmangin an tah a, Sikkim leh Nagaland in puantah, Manipur in Longpi hlum dum atanga siam, Arunachal Pradesh in an Mon Shugu lehkhapuan, Assam in Gogona-mau hmangin rimawi hmanrua te an siam ve bawk.