Spotify-in kum 20 tlin puala logo thar hman reng tum lo

Khawvel pum hla ngaihthlakna lar, Spotify chuan an kum 20 tlin lawmna pualin an mobile app icon chu a hring tle, disco ball ang maiin an thlak thut a, app logo tih danglam thut avang hian user-te zingah sawiselna a nasa hle. Mi tam tak chuan he logo thar hi hmuh hrehawm leh "mawi lo lutuk" tiin, a lem te X lamah post-in an phun nasa hle a ni. Hemi hnu hian Spotify chuan logo pangngai hman a ni leh dawn tih a sawi.

Social media lama thurawn petu, Jack Appleby pawhin he logo thar hi phone screen tê tak teah chuan a fiah tawk loh thu leh rawng hring thim lutuk an hman avanga a mawi loh thu a sawi. Mahse, mi zawng zawngin an sawisel bik lo a, marketer ṭhenkhat chuan mite’n thil danglam leh hlimawm an hrethiam lo chu pawi an tih thu an sawi ve thung.

Lungawi lohna nasa tak thleng chungchangah hi Spotify chuan chhangin, he disco-ball icon hi hun bik atana an hman "guest star" chauh a nih thu leh, kar tharah chuan an logo pangngai (2D icon) kha lo kir lehin an hman dawn thu an puang.