NIT Thundermarch 2020 Winner

North East-a rock band inelna hlun leh lar ber pawl. NIT Thundermarch battle of the bands (beat contest)-ah Mizo band Sword Tune chu thiam berah thlan an ni leh ta.

Battle of the bands winner nih mai hi an la duhtawk lo a, Best Guitarist leh Best Keboardist an la la tel zui. Sword Tune aia band ṭha an awm lo a ni ber. Shirock 2019-ah khan 1st runner up an ni tawh bawk a, hmarchhak rock band ṭha ber zingah an inhlangkai tawh a ni.

NIT Thundermarch 2020 hi Inrinni leh Pathianni khan neih a ni a, Battle of the bands bik hi Inrinni khan an nei.

Sword Tune hi Gospel progressive metal band an ni a, Mizoram aṭangin NIT Thundermarch-ah hian anmahni chiah zuk telin winner an zu ni thei a, Mizo tan hmingṭhatna an rawn hawn leh thei hi an chhuanawm hle. Battle of the bands-ah pawh hian Pathian hla hlir an sa a, chuti chung chuan judge-te lungdumtu ber an la ni thei hi thil ropui tak a ni bawk.

NIT Thundermarch 2020-ah hian Sword Tune guitarist Chama chu best guitarist atan thlan a ni a, an keyboardist Tetea chu best keybordist atan thlan a ni bawk.

An music video hmasa ber 'Rawn pan rawh'

Sword Tune hian tunhnaiah khan an music video hmasa ber 'Rawn pan rawh' tih chu an tichhuak tawh a, TV lamah pawh pekchhuah tawh niin February 21 hian YouTube lama thlir theihin an chhawp chhuak leh dawn. NIT Thundermarch 2020 winner band music video hi rimawi lama tui tan chuan hmaih phal chi a ni lo ang.