Korea Box Office No 1 ah 'The Super Mario Galaxy Movie'

South Korean box office chart tharah 'The Super Mario Galaxy Movie' chu No 1 a ni a, May 1-3 inkar khan entu mi 575,467 neiin USD mtd 3.8 a la lut tih Korean Film Council enkawl KOBIS chuan a tarlang. April 29-a tlangzarh a nih aṭangin USD mtd 4.5 a la lut tawh a ni.

Pahnihnaah 'The Devil Wears Prada 2' awmin, kar hmasa chhung khan USD mtd 3.3 la lutin, sum a lak luh tawh zawng zawng chu USD mtd 9.9 a ni a, entu mi 736,033 an awm tawh a ni. No 1 dinhmun lo hauh reng tawh local horror, 'Salmokji : Whispering Water' chu pathumnaah a tlahniam thung a, USD mtd 2.7 lak luh belhin sum a lak luh tawh zawng zawng chu USD mtd 18.3 a tling.

Science-fiction epic 'Project Hail Mary' chu palinaah awmin, kar hmasa chhung khan USD 776,612 lak luh belhin, March 18-a tlangzarh a nih aṭangin USD mtd 20.3 a la lut tawh. Local coming-of age drama 'Audition 109' chu pangana a ni a, USD 506,887 lak luh belhin, sum a lak luh tawh zawng zawng chu USD mtd 1.9 a ni a, entu mi 300,000 an awm tawh bawk.