AI actor leh writer-in Oscar dawng thei dawn lo

Academy of Motion Picture Arts and Sciences chuan, film-a actor leh writing-a mihring kutchhuak chauh Oscar dawng thei tura pawm a ni dawn tih an sawi. US film industry-a chawimawina sang ber enkawltu, academy hian Zirtawpni khan artificial intelligence (AI) technology hman nasat a nih chhoh zel avangin movie leh documentary hrang hranga Oscar dawng thei tur chin bithliah hi a tichhuak a ni.

AI hmanrua leh technology hman a hluar zel a, hei hian mihring kutchhuak leh hnathawh a luahlan thei dawn nia rinna a awm avangin Academy chuan he dan thar hi a siam a ni. Academy chuan AI hman khapna erawh a tichhuak loa, acting leh writing tih lohah filmmaker-ten an hnathawhna kawng danga AI an hmang a nih pawhin nomination an nih theihna a dang dawn lo tih an tarlang.

Tun hnaiah kum 2025-a thi ta actor, Val Kilmer movie thar tur pawh AI technology hmanga siam tum niin, nikum khan actor leh comedian Eline van der Velden chuan global superstar ni thei turin AI actor a siam thu a lo sawi tawh bawk. Hollywood studio, actor leh author-te pawhin AI company hrang hrang lakah thubuai an lo theh lut tawh bawk a ni.