Miss Universe Mizoram atan Lalrinchhani thlang

Siar Management leh Miss Universe Mizoram Organizing committee bul tuma buatsaih, Miss Universe Mizoram 2026 grand finale chu Sazaikawn Multipurpose Hall, Lungleiah neih a ni a, Miss Universe Mizoram 2026 atan Siaha nula Lalrinchhani thlan a ni. Rinchhani hian Miss Universe India thlanna lo awm turah Mizoram ai a awh ang. Miss Universe India thlanna hi online audition kalpui mek a ni bawk.

Rinchhani hi Zoawmpuia leh Lalnufelite fanu niin Siaha, New Colony I-ah an cheng a, zirna lamah hian BA thleng zirin, lam ngaina tak a ni. Pageantry lamah hian a mikhual lo hle a, a lehkha zir laiin a college kalna Govt. Johnson College-ah kum 2021 khan College Miss atan thlan a ni a, Mega Miss North East 22nd Edition-ah khan a lo inlan tawh bawk. Hei bakah show hrang hrangah model niin a lo inlan tawh ṭhin a ni.

Miss Universe India hi kumin August thla bawr velah hian Glamanand Entertainment Pvt. Ltd bultumin kalpui a ni leh dawn a ni. Miss Universe Mizoram hi Siar Management-te enkawl niin, Miss Universe India-a a telna turah pawh an buaipui chhunzawm ang. State Director hi Amos MS Dawngzuala a ni a, Organizing Committee ah hian Siar Management; High Powered Committee Lunglei; MJA Lunglei; SYMA Lunglei te leh Lunglei a pawl lian hrang hrangte an tel.