Moby-a'n Coachella 2026 aṭanga sum hmuh 'ARO' hlan dawn

American electronic musician, songwriter, producer leh DJ lar ni bawk Moby chuan kum 2026 Coachella festival-a a inlan aṭanga a sum lak luh zawng zawng chu ran dikna humhalhtu pawl, 'Animal Rights Organizations' (AOR) pali hnenah a hlan dawn. He thu hi Ningani khan a social media kaltlangin a tarlang.

Moby chuan sum a hlan chhan sawiin,"Ka damchhan ber chu rante dikna humhalh hi a ni a, Coachella show aṭanga sum leh duhsakna ka dawnte hi ran ho dikna humhalhtu pawlte puih nan leh midang pawhin an lo hriat zau zelna turin hman ka duh a ni," a ti. Moby hi kum 1990 aṭang khan music khawvelah hriat a hlawh chho a, a hla 'Natural Blues' chu kumina Coachella-ah Jacob Lusk nen thiam takin an rawn sa dun leh a ni.

Vegan leh animal rights activist ni bawk, Moby chuan khawvelah ran dikna humhalhtu pawl ṭha tam tak awm mah se, heng pawl palite hi hna danglam leh pawimawh tak an thawh avanga thlang a nih thu a tarlang. "Thil nung tawh phawt chuan mahni duh dan anga nun hmang tura dikna an nei vek a ni," tiin ama principle vawn chu a sawi lang bawk.