Instagram-in PG-13 rating an hmang tawh dawn lo

Ṭhalaite khawih nasat, Instagram leh film siamtu pawl lian, Motion Picture Association (MPA) te inkara inhriatthiam lohna lian tak thleng chu inremna siamin chinfel a ni ta. He inremna hian social media hman dan leh thil thlir dan tam tak a thlak danglam thei dawn a ni.

Instagram chuan "Social media leh film hi a hrang hlak a ni" tih a tarlang tawh dawn a, PG-13 rating an hmang tlem tawh ang a, an hman pawhin MPA hming an hmer tel tawh dawn lo bawk. Inremna hi April 15 aṭangin hman ṭan a ni ang.

Kum 2025 October thla khan Instagram chuan ṭhalaite tana him zawk 'Teen Accounts' a kalpui a; hetah hian an thil hmuh theih nudity, violence, ruihhlo hman sualna lam hawite chu film rating kan hriat lar tak PG-13 nen a inang tih an tarlang a ni. He thilah film siamtu hrang hrang Disney, Netflix, Paramount leh MPA chu an lungawi lo a; "PG-13 hi film tana kan duan a ni a, social media-a thil awm nen a inang lo, nu leh pate in hruai sual thei," tiin thubuai an siam zui a, hmang zui lo turin Meta an hrilh ta a ni. MPA hotu Charles Rivkin chuan thalaite himna chu thupui ber ni mah se, film rating leh social media moderation chu thil hrang hlak a nih thu a sawi bawk.