BTS concert chhimtu beisei aiin tlem, HYBE share tlahniam

K-pop megastars, BTS in Inrinni liam taa comeback concert, Seoul-a Gwanghwamun Square-a an neihah an lo beisei dan aiin chhimtu an tlem a, an company Hybe share pawh a tlakhniam phah duai.

Gwanghwamun Square-a BTS concert hi mi 260,000 in chhim turin an chhut a, mahse pungkhawm hi 50,000 an tling lo niin police lam chuan an chhut. Hetih lai hian Hybe chuan ticket sale leh data aṭangin pungkhawm hi 104,000 vel niin an sawi thung. BTS in comeback tour an neih tur leh album thar, 'Arirang' an tihchhuah tur thu an puan hnuah Hybe share hi a sang chak hle a; mahse, Inrinni concert-a beisei ang zat mipui an punkhawm tak loh hnuah, nimin khan an share hi 15.5% in a tlahniam. Kum 2022 June thla hnua Hybe share tlakhniam nasat ber ṭum a tling.

BTS concert hi Netflix chuan ram 190 chuangah live-in a pe chhuak a, South Korea-ah pawh a pe telin hei hi a hmuna concert chhimtu an tlem chhan pakhat nia rin a ni. Netflix hian live viewer data a la tichhuak lo a, live viewer erawh an tam hle rin a ni.