DD Mizoram Indigenous Games & Cultural Fest: Zaithiam lar ber ber an inlan dawn

Doordarshan Aizawl leh Mizoram Indigenous Games Association (MIGA) thawkdun chuan vawiin aṭang hian Ramhlun Sports Complex-ah Doordarshan Mizoram Indigenous Games & Cultural Fest an buatsaih dawn a, hun hmanah hian tunlai Zoram deng chhuak zaithiam lar ber berte an inlan dawn. DD Mizoram Indigenous Games & Cultural Fest hi Zirtawpni thleng neih tura ruahman a ni.

Vawiin chawhma dar 11-ah hawnna hun hmangin Lilac leh David Darlong-te an inlan dawn a, Chhawkhlei Cultural Club, Pachhunga University College-te’n Hlado chham leh Hnam lam an entir bakah Mizo infiamna hmangin inelna buatsaih a ni bawk ang. Zan lamah Kumtluang Cultural Club, J Thankima College-te’n hnam lam entir ve lehin, Zothana, Daniela, T. Vanlalhmangaihi leh Zomuana te an inlan ang.

Naktuk chhun lama hun hmanah Lily Veng Cultural & Drama Troupe-ten hnam lam an entir dawn a, Vanlalhmangaiha a zai dawn bawk. Zan lamah Huiva Cultural Club, Govt Aizawl College-te’n hnam lam an entir ang a, tunlai zaithiam huhang ngah tak tak - Immanuel Lalremruata, Siampuii Ralte, Bzi Tochhawng leh J Lalrosanga-te an zai ang.