U.S. ah vinyl hralh chhuah a pung

Recording Industry Association of America (RIAA) in kumtawp report a tihchhuahah, kum kalta chhung khan United States-a vinyl an hralh chhuah hmangin USD tld 1 chuang lak luh a ni. Vinyl hralh chhuah hi 9.3% in a pung a, 2024-a unit mtd 43.4 an hralh chhuah aṭangin 2025-ah unit mtd 46.8 ah a pung. CD leh digital download chu 7.8% leh 8% ah a tlahniam thung.

Hetih lai hian record dawr neitute leh collector-te chuan vinyl man a san chak thu sawiin, kum 2020 aṭanga 2025-ah 24% in a pung a, USD 37.22 man a nih tawh tih an sawi. Vinyl hi kum 2000 tawp lam aṭang khan lar chhoin, Taylor Swift chu kum li chhung ramchhunga vinyl album hralh hnem ber a ni. A album hnuhnung ber 'The Life of a Showgirl' chu kum kalta khan copy mtd 1.6 hralh chhuah a ni tih Luminate chuan a tarlang a, Sabrina Carpenter album 'Man's Best Friend' chu pahnihna niin copy 292,000 hralh chhuah a ni. Kendrick Lamar album 'GNX' chu 279,000 hralh niin pathumnaah a awm a, Carpenter album 'Short n' Sweet' chu 262,000 hralh chhuah niin Billie Eilish album 'Hit Me Hard and Soft' chu copy 192,000 hralh chhuah a ni bawk.