Rimawi chhuak thar fante duh ber Pussycat Dolls 'Club Song'

Hunrei tak chhung rimawi khawvel huanga thawm an neih tawh loh hnuah Pussycat Dolls chuan single thar 'Club Song' chu kum ruk hnuah rawn tichhuakin, fan-te duh ber a rawn ni thei nghal. Hla tharah hian founding member pathum Nicole Scherzinger, Kimberly Wyatt leh Ashley Roberts-te an inlan thei a, fan tam tak tan chuan lawm avanga zuan tawr tawrna tham a tling.

Billboard-in hla thar zinga duh ber vote-na poll a siamah Club Song hian vote tla zawng zawng aṭanga 72.48% lawih a hmu pha a, comeback ṭha tak an neih theih zui ngei pawh a rinawm. Kacey Musgraves chuan a hla thar 'Dry Spell' chu pahnihnaah lan puiin vote tla aṭangin 22.31% a hmu pha a; Noah Kahan pawhin 'Porch Light' hmanga vote 2.61% hmuin pathumna dinhmun a luah pha ve bawk.