Lung in (Life Sentence) tlangzarh dawn

Mizo film hlawhtling leh hmuhnawm tak tak lo siam tawhtu, Conflate Video Production chuan an film tha, 'Lung In (Life Sentence)' chu zanin hian Saikuti Hall, Lungleiah an tlangzarh dawn. March 7 zanah Vanapa Hall, Aizawlah tihchhuah a ni dawn bawk a, hemi zan hian Mizo streaming apps Lersia Play-ah dah a ni ang.

'Lung In' film-ah hian Mizo film star kan neih ṭhat, Rosangpuii Ralte leh Gilbert Colney-te chu nupa angin an chang a, an fanu lemah naupang actor thar Sarah Vanlalhriatpuii bakah hmelthar kan hmu nual dawn. Film-ah hian chhungkuain harsatna hrang hrang an hmachhawn dan tarlan a ni a, a hmuhnawm leh hle tura beisei a ni. Rosangpuii Ralte hi stroke vanga hmel inpawtsawi tawh leh nerve ṭha lo kebai angin kan hmu dawn a, a hmel landan a dang hle dawn.

Script hi B Lalbiakvela ziah niin, director a ni bawk a, cinematographer leh editor hi Ngaihawma Fanai a ni. An pahnih thawk dun hian film eng emaw zat an lo tichhuak tawh a, Mizo film Award-ah best film, cinematographer, director leh screen writer award an dawng kim vek tawh a ni.