Ke$ha-in a hla 'Blow' an hman danah White House bei

American singer, TikTok tih hla aṭanga khawvel hriat hlawh Ke$ha chuan thla hmasaa US president Donald Trump kaihhruai sorkarin TikTok kaltlanga post an siama a hla 'Blow' an hmang chu a hriatpuina a nih loh thu leh, tharum thawhna lam chawi lar tumna atana hman a ni chu thil tenawm leh mawi lo tak a nih thu social media account kaltlangin a tarlang.

Ke$ha hla 'Blow' hi video clip pakhat fighter jet hmanga naval lawng, missile hmanga bomb lai video-ah an hmang a; clip hi February 10 khan post tawh niin caption-ah hian "Lethality" tih an hmang tel bawk. Post hian view maktaduai 14.5 nei tlingin TikTok-a like pawh maktaduai 1.8 a tling pha bawk.

House-in clip a post aṭanga kar eng emaw zat a liam hnuah pop singer hian Thawhṭanni khan social media kaltlang hian a sawiselna a tichhuak ta a ni. Ke$ha chuan a hla tharum thawhna chawi larna lam a hman a ni chu a pawmpui loh thu sawiin, hetiang atana a rimawi hman chu a rem tih loh thu a tarlang a ni.