GIG Motors-in eVitara tlangzarh

GIG Motors chuan Ningani zan khan Thara Resort, Falkland-ah Mizorama hralh chhuah theih turin Maruti Suzuki electric car thar eVitara an tlangzarh a, hemi rual hian 2026 Indian Car of the Year Vitoris an pho chhuak bawk.

eVitara hi Maruti Suzuki-in India rama electric car a siam chhuah hmasak ber a ni a, December 2, 2025 khan tlangzarh a ni tawh. Ningani zan khan a behbawm tel loin Mizoramah pho chhuah a ni a, GIG Motors chuan pakhat an hralh chhuak nghal a ni. Mizoramah a man tlawm ber Rs 18,62,763 niin, Rs 21,08,263 leh Rs 21,32,913 man a awm bawk. Him ṭha tak turin air bag pasarih a pai a, a khalhtu tan nuam leh awlsam turin ADAS level 2 a nih bakah changkang taka thuam a ni bawk.

eVitara hi 49 kWh battery leh 61 kWh battery hmang a awm a, charge full-in 49 kWh-in km 440 leh battery lian zawk 61 kWh-in km 543 a tlan thei. Maruti Suzuki chuan an electric car leitute awlsam nan battery charge-na tur a tam thei ang ber bun tumin hma a la tel nghal. Mizoramah GIG Motors Showroom pahnih Edenthar leh Thuampui bakah Service Centre, ITI Vengah charging station bun fel a ni tawh a, Aizawl chhung leh pawn oil filling station hrang hrangah dah a ni bawk ang.

2026 Indian Car of the Year, SUV laihawl huanga mi Vitoris hi September 3, 2025 khan tlangzarh a ni a, zawrh chhuah a nih aṭanga thla li chhungin 50,000 an hralh thei a ni.