Red Giant Movies film-ah Rajinikanth leh Kamal Haasan

Red Giant Movies feature film thar 'KHxRK' ah Indian actor leh filmmaker Kamal Hasaan leh, Indian actor Rajinikanth an chang dun dawn. Project hi Nelson Dilipkumar ziah niin, kum 2023-a a film ziah 'Jailer' ah pawh Rajinikanth hi a lo chang tawh a, Tamil ṭawnga film siam hlawhtling ber pawl zinga mi a ni. 'KHxRK' hi Tamil, Telugu leh Hindi ṭawnga siam tur a ni a, production kimchang leh a changtu tur dangte pawh puan belh a la ni ang.

Rajinikanth leh Hasaan-te hi kum 1970 bawr chho leh kum 1980 vel khan Tamil cinema eng emaw zatah an lo chang dun tawh a, chung zingah chuan 'Apoorva Raagangal', 'Moondru Mudichu', 'Avargal', '16 Vayathinile' leh 'Ninaithale Inikkum' te an tel. Film-a mumal taka an lan dunna hnuhnung ber chu kum 1979-a fantasy film 'Allauddinum Albhutha Vilakkum' a ni. Kum 1981-ah comedy 'Thillu Mullu' ah chang dun lehin, he film-ah hian Haasan chu scene tlemteah a inlan ve a ni.