Environment humhalh ṭhate chawimawina hlan

UPC NEI hnuaia ṭhalai pawl, General PYD Environment Protection Committee chuan February 23, Thawhṭanni zan khan Salem Veng Kohhran Biak-inah UPC North East India hnuaia environment humhalh kawnga hma la ṭha district-te hnenah chawimawina a hlan a; thilsiamte chhantu chawimawina buatsaih ṭhintu Lalthara-te Unau Foundation (LUF) secretary Upa Lalnunmawia Chuaungo-in a hmanpui.

Chawimawina inkhawm hi General PYD Environment Protection Committee chairman Upa Vanlalropeka'n a kaihruai a, General PYD president Rev. C Lalthantluanga'n hunserh hmangin, Upa Lalnunmawia Chuaungo-in fuihna thu a sawi a ni.

UPC NEI hnuaia environment humhalh kawnga hmala ṭha district-te chu Aizawl East District, North Mizoram District leh Lunglei District-te niin, Lawngtlai West District Environment Protection Committee, Chhimtuipui District PYD leh City PYD Co-ordination Committee-te hnenah lawmpuina leh pawisa hlan an ni bawk.