'Tan In Kawngka' tlangzarh dawn

Zanin dar 7:30 hian Vanapa Hall-ah 'Tan In Kawngka' film tlangzarh a ni dawn. He film hi 'Million Dollar Boy' film hlawhtling taka lo siamtu, One Vision Cine Production kutchhuak tho niin, a hmuhnawm leh hle a rinawm. Mizo film star kan neih ṭhat zinga mi Tommy, Sang Sangi leh Sena Ngente te an chang a ni.

Tun hnaiah film tihchhuah a tam tawh avangin mipui lamin ngaiah an nei lek lek tawh nia a hriat thu director Lalnunsiama (SVP) chuan a sawi. An film thar chu kawng engkimah an uluk thu sawiin, OTT hmanga lo leitute pawhin en manhla an tih ngei a beisei thu a sawi.

Script hi Central YMA Short Film Competition-a lawmman pakhatna latu, ‘Ni Ropui’ script ziaktu David Lalrinsanga ziah a ni. A thawnthu hian belhchian a dawlin naupang aṭanga puitling thleng pawha hmuhnawm tur a nih thu Film Director chuan Vanglaini a hrilh.

One Vision Cine hian kum khatah film tam an siam ngai lo a, pre production leh post production lamah hun sen hnem an duh vang a ni tih an sawi. Film hi LERSIA PLAY leh AIDU PLAY-ah te en theih a ni dawn a ni.