Mana Motors-in Mahindra XUV 7XO tlangzarh

Mana Motors chuan kum thar lawm nan nimin chawhnu khan Mahindra XUV 7XO an tlangzarh. Bawngkawn, Aizawl-a an showroom-ah Transport Department director Er R Lalrammawia'n hralh chhuah turin a khuh hawng.

2025 chhunga India rama passenger car hralh hnem ber dawttu, Mahindra chuan XUV 7OO thuam ṭhain a hming an thlak a, January 5 khan India ramah XUV 7XO tlangzarh tawhin ni kaw hnuah Mizoramah pho chhuah a ni ve leh. Mana Motors Dealer Principal Dr Franklin Lalrinngheta chuan tuna an tlangzarh XUV 7XO hi 7OO thlakna a nih thu sawiin ṭha, him leh chuan nuam leh zual tura siam a ni a, chhungkaw lirthei ṭha tak a nih a beisei bawk.

Dr Marina hian December 2025-ah hnuhma chhinchhiahtlak an hnutchhiah zo chiah tih sawiin : "Thla liam taah car 217 kan hralh a, Mana Motors a din hnua thla khat chhunga kan hralh hnem ber a ni. Car pakhat cheng nuai 10 chuang deuh vek a ni a, kan lawm hle a ni," a ti.

XUV 7XO hi chi hrang paruk awmin rawng hrang chi sarih a awm bawk. Petrol engine 2.0 litre niin a man tlawm ber (on-road price) Rs nuai 15.49 niin a to ber Rs nuai 24.91-in a lei chhuah theih a, diesel engine 2.2 litre niin a man tlawm ber Rs nuai 16.91 niin a to ber Rs nuai 25.66 a ni ve thung.