Indian Idol 3 winner Prashant Tamang a thi

Singer leh actor, Indian Idol season 3 winner ni bawk, Prashant Tamang chu nimin khan New Delhi-a a chenna inah kum 43 mi niin stroke vangin a thi.

Darjeeling khaw chhuak, Tamang hi kum 2007-a Kolkata Police constable a nih laiin Indian Idol intihsiaknaah telin pakhatna a ni a, India ram pumah lar zuiin a bikin West Bengal-ah chuan a lar zual hle a ni. A hnuah album 'Dhanyavad' tichhuakin ram pawn lamah pawh a perform nasa a, playback leh live performer ṭha tak a ni.

Indian Idol a tel lai hian West Bengal Police Orchestra-ah a lo tel ṭhin bawk. Lemchan lamah a thiam thilte pun tir zui zelin Taatal Lok season 2-ah khan Daniel Lecho lem a lo chang tawh bawk. Lem chan lama a inlanna hmasa ber chu Nepali hit Gorkha Paltan, kum 2010 a tihchhuah kha niin film hrang hrang Angalo Yo Maya Ko, Kina Maya Ma, Nishani, Pardesi, leh Kina Mayama-ahte a lo chang tawh bawk.

Tamang hian screen leh stage lama a sulhnu vang hian Gorkha hnam zingah ngaihsan a hlawh zui hle a, Indian Idol winner a nih hnu phei hi chuan ram chhung hmun hrang hranga Gorkha community chu nasa takin a hui khawm a tih theih bawk a ni.