Shillong-ah Scorpions ‘Coming Home 2026’ India tour nei dawn

German hard rock band Scorpions chuan April 21 hian Meghalaya khawpui Shillong-ah an tour ‘Coming Home 2026’ chu JN Stadium-ah neih a ni dawn tih a buatsaihtute chuan Nilaini khan an puang.

BookMyShow Live produce leh promote, India tour hi kum sawmhnih dawn hnua Scorpions-in India a an perform leh hmasakna ber tur a ni. India rama state paliah tour hi neih a ni ang. Shillong-ah khuh hawn a ni dawn a, April 24-ah Delhi-NCR-ah, April 26-ah Bengaluru-ah, April 30-ah Mumbai-ah neih a ni dawn tih a buatsaihtute chuan an tarlang.

Ticket hi January 14 chawhnu dar 12-ah Artist Pre-Sale hmanga hralh chhuah ṭan a ni dawn a, hemi hnu hian Kotak Mahindra Bank credit card neitute tan January 15 chawhnu dar 12-ah exclusive pre-sale neih a ni ang. General ticket hi January 17 chawhnu dar 1-ah hawn a ni dawn a, BookMyShow aṭang chauha lei theih a ni ang.