France leh Malaysia-in AI chatbot Grok bei zui ve leh

India-in X kaltlang AI chatbot Grok siam ṭhat leh him zawka hman theih tura thlak danglam tura an tih hnuah, France leh Malaysia chuan Grok chu taksa lang tam zawnga hmeichhe thlalak a siam danglam theihna chu tidanglam turin an ngen ve leh.

Elon Musk chuan X kaltlangin thil thlengte vang hian ngaihdam dilna a tichhuak. Hmeichhia kumtling lo niawm tak thlalak AI hmanga siam danglam a ni chu pawi a tih thu leh, mi dang tana thil ṭha lo zawk a thlen chu pawi a tih takzet thu a tarlang. Hemi rual hian xAI chu hetiang thil a thlen nawn tawh lohna tura enfiah a nih tur thu a tarlang tel bawk. Musk chuan Inrinni liam ta khan Grok hmanga dan phal loh thil siam upload chhawngte chuan a nghawng na tak an tuar ve ngei a ṭul dawn niin post a lo siam tawh bawk.

Heng chungchangah hian France thuneitute chuan hmalak ngei an tum thu an puang chiang nghal a, hetiang chiah hian Malaysian Communication and Multimedia Commission chuan Grok hman sual chungchangah hian thuchhuah an siam ve nghal a ni.