January-ah K-pop group lar tak takten album tichhuak dawn

K-pop group lar leh langsar tak takten tun thlaah album an tichhuak dawn a, ngaihven an hlawh tlang hle. Music thar tichhuak tur zingah group lar - EXO leh Blackpink bakah hitmaker Seventeen leh Enhypen te an tel.

Blackpink hian group anga kum hnih chuang an reh hnuah, nikum kum chanveah khan Deadline World Tour an nei leh ṭan a, an album thar pawh January thlaah a chhuak dawn tih group parent company, YC Entertainment chuan a sawichiang tawh.

EXO pawhin January 19-ah album, REVERXE an tichhuak dawn. Hei hi an group full-length album pariatna tur niin hla pakua a awm dawn. Seventeen group member, DK leh Seungkwan te chuan mini-album 'Serenade' chu January 12-ah an tichhuak dawn bawk. Group member 13 zinga ṭhenkhat chu mandatory military service an ṭan avangin, an group hian subunit performance lam an uar chho a ni.

K-pop group zinga an debut aṭanga chhiara Coachella Music Festival-a inlan thei rang ber, Enhypen pawhin January 16, 2026-ah an EP pasarihna, 'The Sin : Vanish' an tlangzarh dawn bawk. Album storyline nei ṭha ber zinga mi, Enhypen hian an album hmasa - Dark Blood, Orange Blood, leh Romance: Untold-a vampire lore an kalpui chu album tharah pawh hian an chhunzawm leh dawn.

BTS pawhin kum li chhung group anga an chet chhuah tawh loh hnuah, March 20-ah an comeback dawn tih an sawichiang tawh a, world tour an nei dawn bawk. BTS member-te hian mandatory military service an zo fel vek tawh a ni.