Beyoncé a billionaire ta

Forbes chuan American singer, Beyoncé chu billionaire list-ah a telh a, musician zingah khawvela mi hausa tawntaw list-a lang thei pangana a ni.

Forbes billionaire list-ah hian Beyoncé hmain musician zingah Taylor Swift, Rihanna, Bruce Sprinsteen leh Beyoncé pasal Jay-Z te an lo lang tawh. Business magazine-in list a tihchhuah tharah hian Beyoncé hi USD tld 2.5 hu neiin an tarlang. Thla tir lam khan Forbes chuan Beyoncé hausakna hi USD mtd 800 hu niin a lo sawi tawh a, kumtawp hmain billion nei pha turin a chhut a ni.

Beyoncé hian 2023 Renaissance World Tour aṭangin USD mtd 600 dawn a la lut thei a ni. Hei bakah a concert film produce bawkin, AMC theater chain nen inremna an siam a ni. Global box office-ah a film hian USD mtd 44 la lutin, heng aṭanga a zahve dawn chu Beyoncé hian a chang ve bawk. Bloomberg in billionaire list a siamah musician zingah Selena Gomez telh mah se, Forbes chuan  a pawm ve lo a, Gomez hausakna hi USD mtd 700 in an chhut ve thung.