Mariah Carey-i'n an khinnaah thiam a chang

American singer, Mariah Carey chuan a Krismas hla, 'All I Want For Christmas’ chungchanga copyright bawhchhiaa puha an khinaah thiam a chang a, a legal fee atan $92,000 pek a ni bawk.

Kumin kumtir lam khan Troy Powers leh Andy Stone chuan kum 1994-a Carey hla tihchhuah, lar zui ta em em chu kum 1989-a country song an tihchhuah title a copy tiin an khing a, USD mtd 20 chawi turin an phut a ni. Mahse court chuan a ngaihtuah hnuah, copyright bawhchhiaa an puhnaah hian finfiahna ṭha leh rintlak tak pek tur na nei lo tih an sawi a, an thubuai theh luh hi a hnawlsak ta a ni.

Hetih lai hian 'All I Want For Christmas’ hi kumtin Krismas dawna a lar chhoh ziah angin, kuminah pawh record siam belh zelin Billboard Hot 100 chart a thunun leh. A tihchhuah tir lamah hian chart-ah No 1 a ni mai bik lo a,kum 2019 thleng khan No 1 a ni lo. Mahse hemi hnu hian streaming platform a lar chho a, a hla pawh holiday season apiangin No 1 a rawn ni ta zel a ni.