Mizoram Drum Festival neih a ni dawn

Mizoram rimawi huanga a hmasa ber turin 'Mizoram Drum Festival' chu December 5 leh 6 hian Vanapa Hall-ah neih a ni dawn.

He festival hi Roland India, Galaxy Digital leh Active Sound ṭang hoin an buatsaih tur a ni. Category pathum U-14, U-19 leh Open category-ahte inelna buatsaih a ni ang.

Drum Festival-ah hian multi-instrumentalist Nishant Hagjer chu judge panelah a ṭhut dawn bakah, a hoin masterclass leh drum clinic-te neih a ni dawn. Ani bakah Mizo drummer kan neih ṭhat zinga mi Reuben Pachuau IIIrd Sovereign drummer, leh Drop Doubt drummer John Tetea te judge panel-ah an ṭhu dawn bawk a, inelna boruak a sang dawn tih pawh a chiang.

Category hrang hranga pakhatnate lawmman a ṭha dawn hle. U-14 Drum-Off champion hian Roland TD 02K a dawng dawn a, U-19 champion-in Aedan 1 Pro Electric drums dawngin, Open category champion-in Roland TD 07 DMK a dawng bawk ang. Consolation prize-ah Roland Drum Triggers, Drumstick packs leh Roland official merchandise-te a dawn theih dawn bawk a ni. Mizoram Drum Festival hi kumtin neih tura ruahman a ni bawk.