Lehkhabu bawm : TC Jonunsanga lehkhabu "Zo Daifim" tlangzarh

Mizoram Academy of Letters (MAL) Joint Headquarters Lunglei Secretary, TC Jonunsanga lehkhabu thar, "Zo Daifim" chu 2nd Battalion Mizoram Armed Police (MAP) Commandant & Lunglei Officers' Club President Francis Lalnuntluanga Ralte chuan November 26, 2025 khan Lunglei Press Club-ah a tlangzarh.

Lunglei Government College-a Head of Department (English) Prof. Lalchhanhima Fanchun chuan hun kaihruaiin, UPC (NEI) pastor Rev. H. Roṭhuama'n hunserh a hmang. T. Vanlalhruaia (Senteii Pa) chuan lehkhabu thlir lawkna hun hmangin, MAL Joint Headquarters Lunglei President C. Hrangdula, Mizoram Journalists' Association (MJA) Lunglei District President H. Lalthansanga leh sawm bikte aṭangin thu sawi ngaihthlak a ni. Lehkhabu tlangzarhtu, Francis Lalnuntluanga Ralte chuan an thil tawn hrang hrang leh an suangtuahnate mi dang chhiar atan leh mi rilru khawih tura chhawp chhuak ṭhintu ziak mite fakawm a tih thu sawiin, thu leh hla chu mihring inchher puitlinna hmanraw pawimawh ber pakhat a nih thu a sawi.

'Zo Daifim' hi thuziak chi hrang hrang 22 khung khawmna niin, phek 261-a chhah a ni. Lengchhawn Offset chhut leh chhuah niin, a man Rs 300 a ni.