Inter-School Public Speaking Competition zawh a ni ta

Lamtluang Lifeskills Academy buatsaih, Inter-School Public Speaking Competition chu nimin, November 27, 2025 khan Vaivakawn Cultural Centre cum Auditorium-ah final round neih a ni a, result puangin lawmman sem nghal a ni bawk.

Inelnaah hian Middle School, High School leh Higher Secondary School level-ah school hrang hrang aṭangin zirlaite an inel a. Tûn kâr Nilaini khân top 10-a tlingten inelna an nei a, a tiṭha zual top 3 thlan chhuah niin, anni hian nimin chawhma dar 10:00 aṭang khan inelna an nei zui leh a ni.

Lamtluang Lifeskills Academy hian Public Speaking Competition hi nikum khan School level leh College level-ah hlawhtling takin a lo buatsaih tawh a, kumin October 28 khân a ṭum hnihna atan Inter-College Public Speaking Competition pawh neih a ni. Anni hi 'International Tie-Up Academy' niin, session thar aṭangin Pre-School aṭanga High School thleng zir theih tûrin hma an la mêk bâwk.