Australia-in 'Twitch' khap ve leh

Australia sorkar chuan tleirawl kum 16 chin hnuailam tana social media platform hrang hrang hman tur a khapna a siam chu an hman ṭan hmain watchdog lian eSafety chuan khap tur zingah Twitch an tihbelh leh. Hetih laiin Australia Social Media Minimum Age (SMMA) danah hian Pinterest erawh a tel lo thung.

eSafety-in khap zinga Twitch a telh hnu hian, Australia mi kum 16 hnuailam tan December 10 aṭangin Twitch account a siam theih dawn loh a, hemi bakah kum 16 hnuailam account nei sa pawh nakkum January 19 aṭangin tihtawp sak an nih tur thu a tarlang tel bawk.

Social Media hrang hrang khapna hi December 10 aṭanga kalpui ṭan tur niin khap zingah hian Meta enkawl Facebook, Instagram, bakah Snapchat, TikTok, X, YouTube, Reddit, leh tualchhung streaming service Kick-te an tel. Australia hian kum liamta khan kum 16 hnuailam tana social media khapna tur dan hi an lo pass tawh a ni.