TVS Ntorq 150cc khuh hawng

KC TVS chuan nimin khan Millennium Centre kawt, Dawrpuiah scooter thar Ntorq 150cc an khuh hawng a, a hmunah mi 17-in leiin an khalh haw nghal. An showroom, Bawngkawn aṭanga an pek chhuah nen tlangzarh ni hian 30 dawn an hralh nghal.

Chief Executive Officer Kevin Vanlaltlana chuan Mizoram dealer an nih aṭangin tun thla hi KC TVS-in kum thum an tlinna a ni a, an beisei aia chakin hma an sawn tih a sawi. Ntorq 150cc pawh hi hauh lawk an tam a, Ntorq 125 nen part a inṭawm hnem a, buaina a awm dawn lo tih sawiin, "A engine a ṭha a, hybrid-in a puih telh avangin kawng chho leh tlan chak duh hunah a pui dawn. A tyre a len loh avangin zawhna a awm a, tyre lianin power a heh avangin a chak loh phah zawk a ni," a ti. India rama 150cc hyper sport scooter hmasa ber niin an sawi a, Mizoramah Rs nuai 1.352 leh nuai 1.449-in a lei chhuah theih a ni.

India rama sorkarin lirthei hralh zat a chhinchhiahna Vahan-ah October 2025 chhungin KC TVS-in 306 an ziak lut a, November-ah ni 21 thleng 200 an ziak lut tawh.