The Game Awards nominee aṭangin Megabonk inhnukdawk

Video games industry huanga che ṭhate hnena chawimawina hlan ṭhin, 'The Game Award' nominee chu Thawhṭanni khan puan a nih hnuah computer games lar Megabonk chu nominee aṭangin a inhnuk dawk. Megabonk solo developer Vedinad chuan Thawhlehni khan an games social channel aṭangin an inhnuhdawh thu hi a tarlang.

Vedinand chuan,"The Game Awards aṭangin kan inhnukdawk a, he dinhmun hi kan tan chawimawina leh suangtuah ṭhin ni mah se Megabonk hi TGA a 'Debut Indie Game' meuha lang tur chuan a la tling tawk lo a ni," a ti. Developer lam chuan studio dang hnuaiah pawh game a siam tawh thu sawiin Megabonk chu a debut game a nih loh thu a sawi lang bawk. Hetih laiin TGA organiser lam hian an website lama nomination vote theihna an siam aṭangin Megabonk hi an la dah chhuak lo a, an paih dawn leh dawn loh engmah an la sawi lang lo thung a ni.