Lersia Play-ah 'Keimi 2' ngamtu awm lo

Lersia Play aṭanga October thla chhunga film entu ngah zualte tihchhuahah, 'Keimi 2' in entu nei tam berin ngamtu a nei lo. 'Keimi 2' hi October 2 khan tlangzarh niin Lersia app bakah khaw hrang hrangah chhuah a ni bawk.

'Keimi 2' hi Mizo thawnthu behchhana siam niin, a prequel 'Keimi' chu kum 2023 khan tihchhuah a lo ni tawh a, chart-ah hian panganaah ala lang pha bawk. Keimi film pahnih hi Christo Pa ziah leh direct ve ve niin Zoram mipuite en duh leh ngainat chi tak a tih theih. A film siamnaah hian mihring pawh an inhnamhnawih tam hle a, Keimi 1-ah hian mi 100 chuang telin, 2 zawkah phei chuan mi 731 ngawt an tel a; kum khat leh thla li chhung teh meuh buaipui a ni.

Pahnihnaah In-House production kut chhuak, 'Ka Nupui Chu Rukru' a awm. September 11 khan tlangzarh niin, tunlai Zoram khawvel boruak nena inmil tak tura siam a ni a, mipui ngainat pawh a hlawh hle. Pathumnaah comedy lam hawi 'Keimah Chhuahlawma (JCB Officer)' tih chu a lang bawk a, nuihna tur a tamin a changtu te'n an zir bawka comedy lam hawi film en manhla tak a ni. Leitlang Picture kut chhuak 'Mawla Loves Mawli' chu palinaah a lang a; hmangaihna, inṭhian ṭhatna, leh inpumpekna tarlanna film, Mizo en duh chi tak a nih avangin a hit zui zel a rinawm.