Zorinsanga MV thar a chhuak

Mipa gospel artist kan neih ṭhat zinga mi, Zorinsanga chuan music video thar, 'Ka la chawl ve ang' tih chu nizan khan a tichhuak. Lalnunpuia Hrahsel YouTube channel-ah dah chhuah a ni.

He hla hi Lalnunpuia Hrahsel phuah niin vanram ngaih hla, ringtuten lei hrehawmna chawlhsana vanrama kan la chawlh ve dawn thu tarlanna a ni. Lusun chhungte, hrehawmna leh natna avanga hrehawm tuar mek tan leh, van lam thinlunga nei tlatte tan a hlu hle ang. Recording hi HC Records kutchhuak a ni. Sound track hi Kima Chhangte siam niin music video hi Mspace kut chhuak a ni. Kumin chhunga Zorinsanga'n hla a siam hmasak berna a ni bawk.

"Krismas boruakte hi kan hmangaih kaltate kan ngaih hun lai ber leh, kan lunglen hun lai ber a ni bawk a tiin tlai khawhnuah he hla hi kan buaipui leh ta a ni," tiin Zorinsanga chuan Vanglaini a hrilh. Midangte tan malsawmna ni se tih chu a ṭawngṭaina a nih thu a sawi.