CK Hyundai-in Venue thar an tlangzarh

CK Hyundai chuan Inrinni khan an showroom, Bawngkawnah Venue chhuak thar an tlangzarh. Mizo infiammi zinga hriat hlawh tak, Lalrina Renthleiin a tlangzarh a ni. Venue chhuak thar hi hauh lawk 35 an awm a, khuhhawnnaa tel zingah hauh zui an awm nghal nual bawk.

Dealer principal Joseph Lalchhanhima chuan Venue hi a chhuak hmasa pawh an car zawrh zinga an hralh tam ber a ni tih a sawi. May 2019 khan Venue hmasa ber tlangzarh a ni a, thla liam ta thlengin India-ah 80,000 chuang an hralh chhuak hman. Hyundai-in SUV a siam chhuah zingah Creta tih loha India rama a hralh tam ber a ni a, Mizoramah erawh Venue an hralh thei ber ve thung a, kum ruk chuang hnuah a thar, chhuan hnihna an tichhuak.

Venue thar hi a hmasa nen a sei zawng inchenin metre 4 chin compact SUV a ni a, a thar hi a liana a sang zawk. Mizoramah a man tlawm ber Rs nuai 8.1 leh a to ber Rs nuai 15 vel a ni. Venue thar hi chi hrang pariat awmin a pangngai leh N-Line-ah rawng chi hrang pariat ve ve a awm. Him ṭha zawk tura thuam thar a nih bakah driver puitu khawl changkang zawk bilh telin, a chhung an chei dan leh kawng hrang hrangah a chhuak hmasa aia ṭha tura duan a ni.